11 verses
1 וישב יהושפט מלך יהודה אל ביתו בשלום לירושלם׃
2 ויצא אל פניו יהוא בן חנני החזה ויאמר אל המלך יהושפט הלרשע לעזר ולשנאי יהוה תאהב ובזאת עליך קצף מלפני יהוה׃
3 אבל דברים טובים נמצאו עמך כי בערת האשרות מן הארץ והכינות לבבך לדרש האלהים׃
4 וישב יהושפט בירושלם וישב ויצא בעם מבאר שבע עד הר אפרים וישיבם אל יהוה אלהי אבותיהם׃
5 ויעמד שפטים בארץ בכל ערי יהודה הבצרות לעיר ועיר׃
6 ויאמר אל השפטים ראו מה אתם עשים כי לא לאדם תשפטו כי ליהוה ועמכם בדבר משפט׃
7 ועתה יהי פחד יהוה עליכם שמרו ועשו כי אין עם יהוה אלהינו עולה ומשא פנים ומקח שחד׃
8 וגם בירושלם העמיד יהושפט מן הלוים והכהנים ומראשי האבות לישראל למשפט יהוה ולריב וישבו ירושלם׃
9 ויצו עליהם לאמר כה תעשון ביראת יהוה באמונה ובלבב שלם׃
10 וכל ריב אשר יבוא עליכם מאחיכם הישבים בעריהם בין דם לדם בין תורה למצוה לחקים ולמשפטים והזהרתם אתם ולא יאשמו ליהוה והיה קצף עליכם ועל אחיכם כה תעשון ולא תאשמו׃
11 והנה אמריהו כהן הראש עליכם לכל דבר יהוה וזבדיהו בן ישמעאל הנגיד לבית יהודה לכל דבר המלך ושטרים הלוים לפניכם חזקו ועשו ויהי יהוה עם הטוב׃
Source: Bible texts from eBible.org: ترجمهی قدیم (۱۸۹۵); ترجمة فاندايك; התנ״ך והברית החדשה; World English Bible (with Deuterocanon); King James Version (with Apocrypha); Lutherbibel 1912; Louis Segond 1910; Reina-Valera 1909; תנ״ך – Westminster Leningrad Codex; Καινὴ Διαθήκη – Byzantine Text. · Public domain (eBible.org)